یەک شەممە, 01 شوبات 2015 12:37

ئاماری نه‌ته‌وه‌ یه‌كگرتووه‌كان بۆ ژماره‌ی قوربانیانی مانگی كانونی دووه‌م ٢٠١٥

به‌غدا،١ی شوباتی ٢٠١٥- به‌ پێی ئه‌و ئاماره‌ی ئه‌مڕۆ نێرده‌ی نه‌ته‌وه‌ یه‌كگرتووه‌كان بۆ هاریكاریكردنی عیراق(یونامی) بڵاوی كردۆته‌وه‌، ١٣٧٥كه‌س كوژران و ٢٢٤٠ كه‌سی دیكه‌ش برینداربوون له‌ ده‌ره‌نجامی ئه‌و كرده‌وه‌ توندوتیژیی و تیرۆرستیانه‌ی له‌ مانگی كانونی  دووەمی رابردوودا دا روویانداوه‌٭.  

 

ژماره‌ی كوژراوانی مه‌ده‌نی ٧٩٠ كه‌سه‌ (٥٩ له‌وان پۆلیسن) و برینداره‌ مه‌ده‌نیه‌كانیش ژماره‌یان ١٤٦٩ كه‌سه‌ (٦٩ یان  پۆلیسن) . وێڕای كوژرانی ٥٨٥ كه‌سی تر و برینداربوونی ٧٧١ ی تر  له‌ هێزه‌ جۆراوجۆره‌كانی عیراق .

ئاماری قوربانیانی مەدەنی (کوژراو و بریندار) بەگوێرەی پارێزگاکان

پارێزگای بەغدا خراپترین برودۆخی هەبووە کە تیایدا ١٠١٤ قوربانی هاووڵاتی هەبووە (٢٥٦ کوژراو و ٧٥٨ بریندار). بەگوێرەی ئەو زانیاریانەی کە بەدەست ڕیکخراوی نەتەوە یەکگرتووەکان بۆ هاریکاری عیراق کەوتوون لەلایەن بەڕێوەبەرایەتی تەندروستی پارێزگای ئەنبار تاکو بەرواری ٣١ی کانوونی دووەم؛ ئارەکان لەو پارێزگایە بریتین لە ٧٧٩ قوربانی مەدەنی (١٩٥ کوژراو و ٥٨٤ بریندار). ئەم ئامارە ٤٩ کوژراو و ٣٧٥ برینداری ڕەمادی و ١٤٦ کوژراو و ٢٠٩ برینداری فەللوجەش لەخۆ دەگرێت. لە پارێزگای دیالە تێکڕای ١١٤ کوژراو و ٤٩ بریندار هەبووە؛ لە پارێزگای سەڵاحەددین ١٠٠ کوژراو و ٥٢ بریندار هەبووە؛ لە پارێزگای موسڵ ٨٥ کوژراو و ١٢ بریندار هەبووە و لە پارێزگای کەرکوکیش ١٤ کوژراو و ٦ بریندار هەبووە.  

٭ ئاگاداركردنه‌وه‌ : به‌ شێوه‌یه‌كی گشتی ، یونامی به‌ربه‌ستی هاتۆته‌ پێش له ‌لێكوڵینه‌وه‌ له‌ ژماره‌ی قوربانیان له‌ ناوچه‌كانی ململانێ ،  سه‌باره‌ت به‌ ژماره‌ی قوربانیانی پارێزگای ئه‌نباریش هه‌روه‌ك ئاماژه‌ی پێدراوه‌ ئه‌وا له‌ به‌ڕێوه‌به‌رایه‌تی ته‌ندروستی پارێزگا وه‌رگیراوه‌ . له‌ هه‌ندێك حاڵه‌تیشدا ، یونامی ته‌نها به‌شێك له‌ رووداوه‌كان پشتراست ده‌كاته‌وه. یونامی چه‌ندین راپۆرتی به‌ده‌ست گه‌یشتووه‌ بێ ئه‌وه‌ی بتوانێت پشتراستیان بكاته‌وه‌ ده‌رباره‌ی سه‌دان قوربانی ، وێڕای ژماریه‌كی زۆری قوربانیانی مه‌ده‌نی كه‌ به‌هۆی كاریگه‌رییه‌ لاوه‌كییه‌كانی تری توندوتیژی ژیانیان له‌ ده‌ست داوه‌ دوای ئه‌وه‌ی ماڵه‌كانی خۆیان جێهێشتووه‌ له‌ بارودۆخێكی دژواری كه‌ش و هه‌وادا دووچاری كه‌می ئاو و نه‌گه‌یشتن به‌خۆراك و چاودێری ته‌ندروستی و  نه‌بوونی ده‌رمان بوونه‌ته‌وه‌. 

 

© 2019 United Nations Iraq. هەموو مافەکانى پارێزراوە.