یەک شەممە, 01 ئازار 2015 15:23

ئاماری نه‌ته‌وه‌ یه‌كگرتووه‌كان بۆ ژماره‌ی قوربانیانی مانگی شوبات ٢٠١٥

به‌غدا،١ی ئاداری ٢٠١٥- به‌ پێی ئه‌و ئاماره‌ی ئه‌مڕۆ نێرده‌ی نه‌ته‌وه‌ یه‌كگرتووه‌كان بۆ هاریكاریكردنی عیراق(یونامی) بڵاوی كردۆته‌وه‌، ١١٠٣كه‌س كوژران و ٢٢٨٠ كه‌سی دیكه‌ش برینداربوون له‌ ده‌ره‌نجامی ئه‌و كرده‌وه‌ توندوتیژیی و تیرۆرستیانه‌ی له‌ مانگی شوباتی رابردوودا روویانداوه‌٭. ژمارەی قوبانیانی مەدەنی بریتیبووە لە ٦١١ کوژراو (تیایدا ٣٠ کوژراوی پۆلیسی مەدەنی هەبووە) و ژمارەی بریندارانیش بریتیبووە لە ١٣٥٣ بریندار (کە تیایدا ٢٩ بریندار پۆلیسی مەدەنی بوونە).  

 

ژماره‌ی كوژراوانی ئەندامانی سوپای عیراقی (بە پێشمەرگە و هێزی تایبەت و ئەو میلیشیایانەی کە لەپاڵ سوپای عیراق شەردەکەن بەڵام بەدەر لە ئاماری ئۆپەراسیۆنەکانی پارێزگای ئەنبار) بریتی بووە لە ٤٩٢ کوژراو (بەدەر لە قوربانیانی ئۆپەراسیۆنەکانی ئەنبار) لەگەڵ ٩٢٧ بریندار.  

پارێزگای بەغدا خراپترین برودۆخی هەبووە کە تیایدا ١٢٠٤ قوربانی هاووڵاتی هەبووە (٣٢٩ کوژراو و ٨٧٥ بریندار). لە پارێزگای دیالە ٧٣ کوژراو و ٦٩ بریندار و لە پارێزگای سەڵاحەددینیش ٣٩ کوژراو و ٥٤ بریندار و لە پارێزگای نەینەواش ٤٠ کوژراو و ١٧ بریندار هەبووە. 

بەگوێرەی ئەو زانیاریانەی کە دەست نێردەی نەتەوە یەکگرتووەکان بۆ هاریکاری عیراق (یونامی) کەوتوون لەلایەن بەڕێوەبەرایەتی تەندروستی پارێزگای ئەنبار، ئامارەکان لەو پارێزگایە بریتین لە ٣٧٢ قوربانی مەدەنی (٨١ کوژراو و ٢٩١ بریندار). ئەم ئامارە ٢٣ کوژراو و ١٩٦ برینداری ڕەمادی و ٥٨ کوژراو و ٩٥ برینداری فەللوجەش لەخۆ دەگرێت. 

نوێنەری تایبەتی سکرتێری گشتی نەتەوە یەکگرتووەکان بۆ عیراق، بەڕێز نیکۆلای ملادینۆڤ وتی "هێرشی تیرۆرستی ڕۆژانە لەلایەن ڕێکخراوی داعش بۆ سەر هاوڵاتیانی عیراق بەردەوامە. هەروەها لە چەند شوێنێکیش تۆڵەسەندنەوەی چەند هێزێکی چەکدار بۆتەهۆی کوشتنی چەندین کەس لەو ناوچانەی کە بەم دواییە لەژێر کۆنترۆڵی داعش دەرهێندراون. من بە پەرۆشەوە چاوەروانی دەرەنجامی لێکۆڵینەوەکانی حکومەت دەکەم سەبارەت بەو کۆمەڵکوژییەی کە لە ناوچەی دیالە ئەنجام درا."

ئەو هەروەها ئاماژەی بەوەش کرد کە چارەسەری سەربازی بەتەنها کێشەی داعش بنبڕ ناکات، لەبەر ئەوە "پشتگیری تەواو لە هەوڵە بەردەوامەکانی سەرۆک و سەرۆک وەزیران و سرۆکی پەڕلەمان دەکەم بۆ یەکریزی نیشتیمانی. هەر هەوڵێک بۆ بەدەستهێنانی یەکریزی لەسەر بنەمای ئاشتەوایی نیشتیمانی پێویستە بە پێی دەستور ڕێکبخرێت و بە بەشداری پێکردنی هەموو لایەنە سیاسی و ئایینی و کۆمەڵایەتییەکانی سەرتاسەری عیراق بێت." 

 

٭ ئاگاداركردنه‌وه‌ : به‌ شێوه‌یه‌كی گشتی ، یونامی به‌ربه‌ستی هاتۆته‌ پێش له ‌لێكوڵینه‌وه‌ له‌ ژماره‌ی قوربانیان له‌ ناوچه‌كانی ململانێ، سه‌باره‌ت به‌ ژماره‌ی قوربانیانی پارێزگای ئه‌نباریش هه‌روه‌ك ئاماژه‌ی پێدراوه‌ ئه‌وا له‌ به‌ڕێوه‌به‌رایه‌تی ته‌ندروستی پارێزگا وه‌رگیراوه‌. له‌ هه‌ندێك حاڵه‌تیشدا، یونامی ته‌نها به‌شێك له‌ رووداوه‌كان پشتراست ده‌كاته‌وه. یونامی چه‌ندین راپۆرتی به‌ده‌ست گه‌یشتووه‌ بێ ئه‌وه‌ی بتوانێت پشتراستیان بكاته‌وه‌ ده‌رباره‌ی سه‌دان قوربانی ، وێڕای ژماریه‌كی زۆری قوربانیانی مه‌ده‌نی كه‌ به‌هۆی كاریگه‌رییه‌ لاوه‌كییه‌كانی تری توندوتیژی ژیانیان له‌ ده‌ست داوه‌ دوای ئه‌وه‌ی ماڵه‌كانی خۆیان جێهێشتووه‌ له‌ بارودۆخێكی دژواری كه‌ش و هه‌وادا دووچاری كه‌می ئاو و نه‌گه‌یشتن به‌خۆراك و چاودێری ته‌ندروستی و  نه‌بوونی ده‌رمان بوونه‌ته‌وه‌. بەهۆی ئەم هۆکارانە دەبێ ئەو ژمارانەی سەرەوە بە ڕێژەی نزمترین لەقەڵەم بدرێن. 

 

© 2019 United Nations Iraq. هەموو مافەکانى پارێزراوە.