ئەم پەڕەیە چاپ بکە
سێ شەممە, 16 شوبات 2016 03:00

وتاری نوێنه‌ری تایبه‌تی سكرتێری گشتیی نه‌ته‌وه‌ یه‌كگرتووه‌كان بۆ عیراق یان كوبیش له‌ ئه‌نجومه‌نی ئاسایشی نه‌ته‌وه‌ یه‌كگرتووه‌كان گرنگ

نووسراوە لەلایەن: 

نیویۆرك / ١٦ی شوباتی ٢٠١٦

جه‌نابی سه‌رۆك،

له‌ ماوه‌ی راپۆرتی رابردووه‌وه‌، خه‌ڵكی قاره‌مانی عیراق به‌رده‌وام سه‌ركه‌وتن دژی داعش (ده‌وه‌ڵه‌تی ئیسلامی له‌ عیراق و شام) ئه‌نجام ده‌ده‌ن به‌مه‌ش ئه‌و رێكخراوه‌ توانای به‌كارهێنانی خه‌ڵكی ناڕازی و په‌راوێزخراو به‌ره‌ به‌ره‌ به‌ره‌ لاواز ده‌بێت. له‌ راستیدا، ئازادكردنی شه‌نگال و بێجی و به‌شێكی زۆری پارێزگای ئه‌نبار و پاككردنه‌وه‌ی ناوچه‌كانی ده‌وروبه‌ری له‌ چه‌كدارانی داعش ئه‌و هیوایه‌یان لای خه‌ڵك دروستكرد كه‌ به‌ دڵنیاییه‌وه‌ وڵاته‌كه‌ له‌و رێكخراوه‌ تیرۆریسته‌ پاك ده‌كرێته‌وه‌. له‌لایه‌كی تره‌وه‌، ئه‌م پێشڤه‌چوونانه‌ ئه‌وه‌شیان سه‌لماند كه‌ پشتبه‌ستن به‌ خه‌ڵك و شه‌ر‌كه‌رانی هۆزه‌ ناوخۆییه‌كانی ناوچه‌كانی ژێرده‌سه‌ڵاتی ئه‌و رێكخراوه‌ له‌ به‌شدارییان له‌ ئازادكردنه‌وه‌ی ئه‌و ناوچانه‌ و پاراستنی ئاسایشی شار و ناوچه‌كانیان چه‌ند گرنگه.

ئه‌و سه‌ركه‌وتنه‌ ئه‌وه‌شی نیشاندا كه‌ پشتگیریكردنی عیراق له‌ هاوپه‌یمانی نێوده‌وڵه‌تیی له‌ شه‌ڕی داعشدا زۆر كاریگه‌ر و وزه‌به‌خشه‌ و هه‌روه‌ك چۆن ئاماژه‌ی ئاماده‌كاریشه‌ بۆ رزگاركردنی ناوچه‌كانی تریش و به‌تایبه‌تیش موسڵ. هه‌روه‌ها ئه‌و پشتگیرییه‌ هاندانێكیشه‌ بۆ ئه‌ندامانی تری كۆمه‌ڵگای نێوده‌وڵه‌تی بۆ یارمه‌تیدانی عیراق له‌و شه‌ڕه‌دا.

جه‌نابی سه‌رۆك،

رێكخراوی تیرۆریستی داعش، كه‌ هه‌ڵگری بیروباوه‌ڕ و شێوازی توندوتیژی و تایه‌فی و ده‌مارگیری و تیرۆره‌، هه‌ڕه‌شه‌یه‌كی بێوێنه‌یه‌ بۆ ئاشتیی و ئاسایشیی جیهانی. هه‌ر بۆیه‌ شه‌ڕی ئه‌و رێكخراوه‌ بێگومان ده‌بێ كاری له‌پێشینه‌ی هه‌موو كۆمه‌ڵگه‌ی نێوده‌وڵه‌تی بێت و وڵاته‌ ئه‌ندامه‌كانیش پێویسته‌ هه‌وڵه‌كانیان زیاتر چڕ بكه‌نه‌وه‌.

دوای كۆبونه‌وه‌ی ئه‌نجومه‌نی ئاسایش له‌ ١٨ی ئه‌یلولی ٢٠١٥دا، چه‌ندان هه‌وڵی دیبلوماسیی و دووقوڵی به‌ پشتیوانی هاوبه‌شكارانی جیهانی و نه‌ته‌وه‌ یه‌كگرتووه‌كان بۆ دۆزینه‌وه‌ی چاره‌سه‌رێك بۆ جیگیربوونی سوپای توركیا له‌ باشیكه‌ هه‌ر درێژه‌یان هه‌یه‌ به‌ڵام تا ئێستا هه‌ر بێ ئه‌نجام ماونه‌تنه‌وه‌. منیش سه‌باره‌ت به‌م پرسه‌ هه‌مان داواكارییه‌كه‌ی سكرتێری گشتیی دووباره‌ ده‌كه‌مه‌وه‌ له‌ ده‌ركردنی بڕیارێك به‌گوێره‌ی ده‌ستوری نه‌ته‌وه‌ یه‌كگرتووه‌كان و به‌ ڕێزگرتنی ته‌واو له‌ سه‌روه‌ریی خاكی عیراق. من هه‌روه‌ها به‌ توندی داوا له‌ هه‌ردوو وڵات ده‌كه‌م بۆ نانی هه‌نگاوێك كه‌ بتوانێت هاوكاریی دوولایه‌نه‌ی زیاتر سه‌باره‌ت به‌ سه‌قامگیری و پشتگیری به‌رده‌وام بۆ شه‌ڕی داعش فه‌راهه‌م بكات به‌ له‌به‌رچاوگرتنی راوێژ و ره‌زامه‌ندیی ته‌واوی عیراق.

جه‌نابی سه‌رۆك،

سه‌ره‌ڕای ئه‌م سه‌ركه‌وتنانه‌ش‌ ، كه‌چی داعش هێشتا دوژمنێكی سه‌رسه‌خته‌ و به‌رده‌وامیش، به‌سوودوه‌رگرتن له‌ رووداوه‌كانی سوریا، تاكتیك و پلانه‌كانی خۆی له‌گه‌ڵ بارودۆخه‌كه‌ ده‌گونجێنێت. له‌ راستیدا، داعش هه‌رگیز به‌ته‌نیا به‌ شه‌ڕ له‌ناوناچێت گه‌ر هوكاره‌ بنه‌ڕه‌تییه‌كانی توندوتیژیی و بیروباوه‌ره‌ شاراوه‌كه‌ی نه‌دۆزرێنه‌وه‌. پێویسته‌ سه‌ر‌كه‌وتنی سه‌ربازی هاوته‌ریب بێت له‌گه‌ڵ دابینكردنی سه‌قامگیری و كاری ئاوه‌دانكردنه‌وه‌ به‌ گه‌ڕانه‌وه‌ی بێكیشه‌ی ئاواره‌ ناوخۆییه‌كان بۆ سه‌ر زێدی خۆیان. شانبه‌شانی ئه‌مه‌ش، عیراقییه‌كان پێویسته‌ ئاشته‌وایی سیاسی و نێوان پێكهاته‌كان بكه‌نه‌ كاری سه‌رلیستی خۆیان.

بێگومان چه‌قبه‌ستنی "رێككه‌وتنی سیاسیی نیشتمانی"ش نیشانده‌ری نه‌بوونی سازانی سیاسی و گه‌ڕانی به‌رده‌وامه‌ به‌دوای به‌رژه‌وه‌ندییه‌ حیزبییه‌كاندا. سه‌قامگیری و ئاسایش و یه‌كڕیزیی عیراق به‌نده‌ به‌ سیسته‌می سیاسیی گشتگر و كاریگه‌ر و یه‌كسانی له‌ دروستكردنی بڕیار له‌سه‌ر ئاستی فیدرال و خۆجێیه‌تیدا. چاره‌سه‌ری راسته‌قینه‌ی پێشگرتن به‌ په‌راوێزی سیاسیی و تایه‌فیش پێویسته‌ هه‌مواركردن یان ده‌ركردنی یاسا هه‌ره‌له‌پێشه‌كانی وه‌ك یاسای داده‌وه‌ری و لێپیچینه‌وه‌ و یاسای پاسه‌وانی نیشتمانی و یاسای لێبوردنی گشتی و دواییش جێبه‌جێكردنییان به‌شێوه‌یه‌كی خێرا بگرێته‌وه‌.

هه‌وڵه‌كانی هێزه‌ سوننییه‌كان و سه‌ركرده‌كانیان بۆ یه‌كخستنی هه‌ڵوێسته‌كانیان سه‌باره‌ت به‌ ئاشته‌وایی نیشتمانی و سیسته‌می فیدڕالی كاریگه‌ر و سیسته‌می ناناوه‌ندكردن (لامه‌ركه‌زی) و رووبه‌روبوونه‌وه‌ی سه‌ركه‌وتووانه‌ی داعش هه‌ر هه‌موویان به‌ شێوه‌یه‌كی یه‌كسان پێویستن. من ده‌ستخۆشی له‌و جۆره‌ هه‌نگاوه‌ نراوانه‌ ده‌كه‌م كه‌ زیاتر ده‌بنه‌ مایه‌ی پته‌وبوون تا په‌رته‌وازه‌یی هه‌روه‌ك چۆن هانی هێزو سه‌ركرده‌ سوننه‌كانیش ده‌ده‌م له‌سه‌ر درێژه‌دان به‌م جۆره‌ چالاكییانه‌ به‌شێوه‌یه‌كی ئه‌وپه‌ڕی گشتگرانه‌.

جه‌نابی سه‌رۆك،

له‌سه‌ره‌تای مانگی حوزه‌یرانیشدا هێرشێكی خوێناوی له‌ میقدادیه‌ی پارێزگای دیاله‌ له‌لایه‌ن داعشه‌وه‌ ئه‌نجامدرا له‌گه‌ڵ ئه‌نجامدانی توڵه‌سه‌ندنه‌وه‌ی پڕتوندوتیژی له‌لایه‌ن چه‌كدرانی میلیشیا به‌دكاره‌كان و گروپه‌ تاوانباره‌كانه‌وه‌ كه‌ بوونه مایه‌ی دروستبوونی ئه‌و نیگه‌رانییه‌ی كه‌ شه‌ڕی تایه‌فی دیسان به‌رۆكی وڵاته‌كه‌ ده‌گرێته‌وه و به‌هۆی گرژیی سیاسی و تایه‌فی و هه‌رێمیشه‌وه‌ زیاتر به‌ره‌و گڵپه‌ ده‌ستێنێت. مه‌به‌ست له‌م هێرشانه‌ش زیاتر خۆشكردنی ئاگری شه‌ڕی تایه‌فی و جه‌مسه‌ربه‌ندیی سیاسی و لاوازكردنی یه‌كڕیزی بوو له‌ عیراقدا. ‌

ئه‌و هێرشانه‌ ئه‌وه‌شیان خسته‌ڕوو كه‌ پێشكه‌وتن له‌ په‌یوه‌ندی نێوان پێكهاته‌كاندا پێویسته‌ به‌ خێرایی بێته‌دی بۆ گێڕانه‌وه‌ی ده‌سه‌ڵاتی ده‌وڵه‌ت و سه‌روه‌ریی یاسا و به‌ڕێوه‌به‌ردنی باش و دادوه‌ری و گه‌یاندنی خزمه‌ته‌ بنه‌ڕه‌تییه‌كان بۆ ناوچه‌ تازه‌ ئازادكراوه‌كان له‌گه‌ڵ كۆنترولی ته‌واوی شه‌ڕكه‌ر و چه‌كه‌كانیش. ده‌زگای ئاسایش له‌ هه‌وڵی تاوتوێكردنی پرسی كۆنترۆلكردنی چه‌كداره‌ سه‌رسه‌خت و هه‌بوونیانه‌ له‌ شاره‌كان‌ به‌تایبه‌تیش له‌ ناوچه‌ ئازادركراوه‌كاندا.

جه‌نابی سه‌رۆك،

سه‌قامگیریی ناوچه‌ ئازادكراوه‌كان و گه‌ڕانه‌وه‌ی بێكێشه‌ی ئاواره‌ ناوخۆییه‌كان له‌وپه‌ڕی گرنگیی سیاسیدایه‌. من خۆم به‌ خۆشحاڵ ده‌زانم كاتێك سه‌قامگیریی ته‌واوی تكرێتتان پێ رابگه‌یه‌نم. به‌شێوه‌یه‌كی گشتی، حكومه‌ت ئه‌وپه‌ڕی پێشینه‌ی به‌ گه‌ڕانه‌وه‌ی ئاواره‌كان‌ داوه‌ و تا ئێستاش زیاتر له‌ ٥٠٠ هه‌زار ئاواره‌ی ناوخۆیی گه‌ڕاونه‌تنه‌وه‌ سه‌ر زێدی خۆیان و حكومه‌تیش ده‌یه‌وێت ئه‌م ژماره‌یه‌ له‌ ٢٠١٦دا بگه‌یه‌نێته‌ ٩٠٠هه‌زار.

به‌ڵام هێشتاش ‍چه‌ندان هۆكاری به‌ربه‌ست بۆ گه‌ڕانه‌وه‌ی ئاواره‌كان هه‌ن وه‌ك مین و ته‌قه‌مه‌نی چێندراو له‌لایه‌ن داعشه‌وه‌ كه‌ پێویسته‌ پێش گه‌ڕانه‌وه‌ پاك بكرێنه‌وه‌ له‌گه‌ڵ وێرانكارییه‌كی زۆری له‌ ژێرخانی ئه‌و ناوچه‌ ئازادكراوه‌كانه‌دا. ئه‌مه‌ش به‌ زه‌قی له‌ رومادی به‌دی ده‌كرێت. بۆیه‌ من داوا له‌ هاوبه‌شكارانی عیراقی و جیهانی ده‌كه‌م بۆ چڕكردنه‌وه‌ی یارمه‌تییه‌كانیان بۆ حكومه‌تی عیراق بۆ به‌تواناكردنی له‌سه‌ر گیڕانه‌وه‌ی ئاسایش و سه‌قامگیری بۆ ناچه‌ رزگاربووه‌كانی ژێر ده‌ستی داعش (ده‌وه‌ڵه‌تی ئیسلامی له‌ عیراق و شام). چه‌قی قورسایی ئه‌م هه‌وڵانه‌ش پێویسته‌ له‌سه‌ر سه‌رله‌نوێ دروستكردنه‌وه‌ی توانای ئاسایش وپولیسی ناوخۆیی بێت له‌رێگه‌ی راهێنان‌ و دابینكردنی كه‌ره‌سه‌ی پێویسته‌وه‌.

تا ئێستاش جه‌مسه‌رگیریی و په‌رته‌وازه‌بوونی سیاسیی به‌ربه‌سست بۆ تواناكانی عه‌بادی سه‌رۆك وه‌زیران دروست ده‌كه‌ن له‌ راپه‌ڕاندنی خشته‌ی كاره‌كانی چاكسازی ، وه‌كو جێبه‌جێكردنی لا مه‌ركه‌زیه‌ت و رووبه‌روونه‌وه‌ی گه‌نده‌ڵی . دوا راگه‌یاندنی سه‌رۆك وه‌زیران به‌ مه‌به‌ستی دروستكردنی ئه‌نجومه‌نێكی وه‌زیرانی پیشه‌گه‌رانه‌تر و ئه‌ندامه‌كانی له‌سه‌ر بنه‌مای كارامه‌یی دوور له‌ به‌شبه‌شێنه‌ی تائیفی و سیاسی ده‌ستنیشان ده‌كرێن ، ده‌بێت هاوپێچ بێت له‌گه‌ڵ جێبه‌جێكردنی خێرای پاكێجیێك بریتی بێت له‌ چاكسازییه‌كی راسته‌قینه‌ی سیاسیی و ئه‌منیی و ئابووریی . ئه‌و كۆمه‌ڵه‌ گرفت و ته‌نگو چه‌ڵه‌مانه‌ قوڵانه‌ی رووبه‌رووی وڵات‌ و گه‌ل ده‌بێته‌وه‌ له‌ قه‌واره‌ سیاسییه‌كان ده‌خوازێت له‌ كۆتا رێگادا به‌یه‌كه‌وه‌ كار بكه‌ن بۆ‌ پشتگیریی كردنی چاكسازییهكی گشتگیر و چڕ، هه‌روه‌كو چۆن بیه‌كه‌وه‌ كاریان كرد له‌ چه‌سپاندنی بودجه‌ی ساڵی ٢٠١٦ .

به‌رده‌وام بوون و به‌ خێرایی هه‌ڵكشانی قه‌یرانی دارایی له‌ عیراق و به‌رزبوونه‌وه‌ی كورتهێنان و ئاڵۆزبوون له‌ بودجه‌ به‌هۆی باری مرۆیی و ئه‌منی و دابه‌زینی له‌ ڕاده‌به‌دری جیهانیی له‌ نرخی نه‌وت چه‌ند هۆكارێكن بۆ كه‌مبوونه‌وه‌ی داهاتی چاوه‌ڕه‌نكراوایی ده‌وڵه‌ت بۆ نیوه‌ ، حكومه‌تی هه‌رێمی كوردستانیش به‌لایه‌نی كه‌مه‌وه‌ دووچاری بارێكی مه‌ترسیداری وه‌كو به‌غدا بۆته‌وه‌ . و له‌وانه‌یه‌ ئه‌م ته‌نگژه‌ و گرفته‌ داراییه‌ كاریگه‌ریی خراپس هه‌بێت له‌ به‌گژداچوونه‌وه‌ی رێكخراوی داعش ، چونكه‌ به‌شێكی زۆری شه‌ڕكه‌ران و به‌تایبه‌تیش پێشمه‌رگه‌ چه‌ندین مانگه‌ مووچه‌یان وه‌رنه‌گرتووه‌ .

منیش ده‌زانم ئه‌گه‌ر ئه‌م بارودۆخه‌ بێ چارسه‌ر كردن مایه‌وه‌ ئه‌وا ناتوانرێت به‌رگه‌ی بگیرێت و به‌ شێوه‌یه‌كی ترسناك ده‌بێته‌ مایه‌ی دابه‌زینی وره‌ی نوێبوونه‌وه‌ی هێزه‌كانی سه‌ر به‌ حكومه‌ت وێڕای كاریگه‌ریی خراپ له‌سه‌ر متمانه‌ی خه‌ڵك، به‌ توێژی گه‌نجان و كۆمه‌ڵگا نێوخۆییه‌كان و كه‌مینه‌كان و ئاواره‌ نێوخۆییه‌كانیشەوە، به‌وه‌ی ئاینده‌یه‌كیان هه‌یه‌ له‌ عیراق. له‌ كاتێكدا پێویسته‌ له‌سه‌ر هه‌ردوو حكومه‌تی هه‌ولێر و به‌غدا به‌ شێوه‌یه‌كی خێرا پێشینەی‌ كاره‌ دارایی و چاكسازییه‌كانی ده‌وڵه‌ت ده‌ستنیشان بكه‌ن و به‌ تواوه‌تی خۆیان به‌ خاوه‌نی بزانن، داوا له‌ كۆمه‌ڵگای نێو ده‌وڵه‌تی ده‌كه‌م یارمه‌تی عیراق بدات له‌ سه‌ركه‌وتن به‌سه‌ر ئه‌م ته‌نگژه‌و چه‌نگ و چه‌ڵه‌مانه‌دا. ئه‌ویش به‌ زیادكردنی پشتگیریی ته‌كنیكی و پاره‌دان به‌ فه‌راهه‌مكردنی قه‌رز له‌ دام و ده‌زگا داراییه‌ جیهانییه‌كان و هه‌رێمییه‌كان. و ئه‌و چاكسازییه‌ ئابوورییه‌ راسته‌قینه‌یه‌ی كه‌ هه‌ردوو حكومه‌تی به‌غدا و هه‌ولێر ده‌ستیان پێكردووه‌ له‌وانه‌یه‌ ببنه‌ رێخۆشكه‌ر بۆ ئه‌م پشتگیریی‌ دارایی‌ په‌یوه‌ست به‌ بوجه‌وه‌ .

ئه‌م ته‌نگژه‌ دارییه‌ له‌ راده‌به‌ده‌ره‌ كاریگه‌رییه‌كی راسته‌قینه‌ی كردۆته‌ سه‌ر په‌یوه‌ندییه‌كانی نێوان به‌غدا و هه‌ولێر ، هه‌رچه‌نده‌ هه‌ر دوو لا ویستێكی به‌رده‌وام ده‌رده‌بڕن بۆ یه‌كه‌وه‌ كاركردن له‌ بواری سه‌ربازیی و دارایی به‌ جێبه‌جێكردنی چاكسازییه‌كانیشه‌وه‌ بۆیه‌ ئومێدم هه‌یه‌ واقیعیه‌ت و پراگماتیه‌ت سه‌ربكه‌ون و ببنه‌ یارمه‌تیده‌رێك بۆ پته‌وكردنی كۆششه‌كانی سه‌قامگیریی و خۆشگوزه‌رانی له‌ عیراق به‌ هه‌رێمی كوردستانیشه‌وه‌ ، كه‌ ئه‌مه‌ش پێویسته‌ بۆ به‌رده‌وامی به‌یه‌كه‌وه‌ به‌شداریكردن له‌ شه‌ڕی مان و نه‌مانی دژ به‌ رێكخراوی داعش.

قه‌یرانی مرۆیش له‌ عیراق زۆر ئاڵۆزه‌ و پێشبینیش ده‌كرێت ئه‌مساڵ فراوانتر و خراپتر بێت، ئه‌مڕژماره‌كه‌ ۆ ته‌نها ٣.٣ ملیۆن ئاواره‌ی نێۆخۆیی نیه‌ بهڵكو نزیكه‌ی ١٠ ملیۆن عیراقی – نزیكه‌ی سێ یه‌كی دانیشتووان- به‌ شێوه‌یه‌كی سەرەکی پێویستییان به‌ جۆرێك له‌ جۆره‌كانی یارمه‌تی مرۆیی هه‌یه‌. با ئه‌وه‌ش له‌ یاد نه‌كه‌ین ئه‌وانه‌ی ئیمڕۆ ئاوارەی نێوخۆیین به‌یانی ده‌بن به‌ په‌ناهه‌نده‌ و كۆچبه‌ر. چونكه‌ پێداویسته‌ مرۆییه‌كان زۆر زۆرن و له‌ توانا نیشتمانییه‌كان ده‌رچووه‌ و ئاشكراشه‌ كه‌ حكومه‌تی عیراق و حكومه‌تی هه‌رێمی كوردستان سه‌رچاوه‌ و داهاتیان نییه‌ بۆ به‌رده‌وام بوونی پێشكه‌شكردنی یارمه‌تییه‌كان نه‌وه‌ك به‌هۆی نه‌بوونی ویست و خۆدزینه‌وه‌ له‌به‌ر پرسیاره‌تی، به‌ڵكو به‌هۆی بارودۆخی مه‌ترسیداری ئابووری و دارایی.

له‌ ٣١ی كانونی دووه‌م، نه‌ته‌وه‌ یه‌كگرتووه‌كان به‌ به‌شداریی حكومه‌تی عیراقی بانگه‌وازێكی مرۆیی بۆ كۆكردنه‌وه‌ی بڕی ٨٦١ ملیۆن دۆلار ئاراسته‌ی كۆمه‌ڵگای ده‌وڵه‌تی كرد به‌ مه‌به‌ستی یارمه‌تیدان له‌ زامنكردنی پێدانی یارمه‌تی به‌و كه‌سانه‌ی پێویستییان پێیه‌تی. سه‌ره‌ڕای ئه‌مانه‌ش ئه‌و كاره‌ساته‌ چاوه‌ڕوانكراوه‌ی به‌هۆی پێشووه‌چوونه‌كان له‌ موسڵ له‌وانه‌یه‌ رووبدات به‌ربه‌ست و فشاری نوێ و ترسناك دێنێته‌ ئاراوه‌ و پێویستییان به‌ رێ و شوێنی به‌ده‌نگه‌وه‌هاتنی خێرای حكومه‌تی عیراقی و كۆمه‌ڵگای نێو ده‌وڵه‌تی هه‌یه‌ به‌ نه‌ته‌وه‌ یه‌كگرتووه‌كانیشه‌وه‌ وێڕای هه‌ڵمه‌ته‌كانی هۆشیاریی گشتیی و پلانه‌كانی به‌ده‌نگه‌وه‌هاتنی كاره‌ساته‌كان وه‌ك راگواستنی هاوڵاتییه‌ به‌ركه‌وتووه‌كان له‌ حاڵه‌تی روودانی كاره‌ساتێكی ئاوادا.

سه‌باره‌ت به‌ ونبووه‌ كوێتیی و ره‌عیه‌ته‌كانی وڵاتانی تر، رێگام پێبده‌ن بگه‌ڕێمه‌وه‌ بۆ نۆهه‌مین ڕاپۆرتی سكرتێری گشتی ( وڵاتانی سێیه‌م ، شتومه‌كه‌ ونبووه‌كانی كوێت به‌ پارێزراوه‌ نیشمانییه‌كانیشه‌وه‌. وه‌كو به‌شێك له‌ به‌رنامه‌ی حكومه‌تی عیراق بۆ چاكسازیی، ئه‌نجومه‌نی وه‌زیران ره‌زامه‌ندی نیشاندا به‌ دابه‌شكردنی دۆسێیه‌كان كه‌ پێشتر له‌ ژێر ده‌سه‌ڵاتی وه‌زاره‌تی مافی مرۆڤدابوون و بڕیاری دا به‌ گواستنه‌وه‌ی لایه‌نه‌ ته‌كنیکییه‌كانی دۆسێی‌ كۆێتییه ونبووە‌كان بۆ وه‌زاره‌تی به‌رگری.

له‌ كاتێكدا ئه‌مه‌ به‌ هه‌نگاوێكی ئه‌رێنی داده‌نرێ، پێویسته‌ حكومه‌تی عیراق ئه‌م بڕیاره‌ جێبه‌حێ بكات و سه‌رچاوه‌ی دارایی پێویستی بۆ ته‌رخان بكات بۆ دلنیابوونه‌وه‌ له‌وه‌ی كه‌ كاركردن له‌سه‌ر ئه‌م بابه‌ته‌ بێ وچان به‌رده‌وامه‌ .

هاریكاری كردنی نێوان عیراق و كوێت به‌رده‌وامه‌ و گه‌یشتۆته‌ ئاستێكی نوێ ـ له‌ مانگی كانونی یه‌كه‌م و له‌ میانه‌ی خولی پێنجه‌می لێژنه‌ی وه‌زاری هاوبه‌ش له‌ نێوان عیراق و كوێت ، هه‌ردوو لا چه‌ند رێكه‌وتنامه‌یه‌كیان له‌ چه‌ندین بوار ی وه‌ك لاوان و وه‌رزش و پشكنین و چاودێری كردن و په‌یوه‌ندییه‌كان مۆر كرد و سه‌ره‌ڕای هه‌ندێش حكومه‌تی عیراق تا ئێستا خراوه‌ته‌ ژێر پابه‌ندی بوونێكی ده‌وڵه‌تی بۆ زامنكردنی پێشوو‌ه‌چوون.

نه‌ته‌وه‌ یه‌كگرتووه‌كان به‌ردوامه‌ له‌ كاركردن له‌ بارودۆخێكی قورس و هه‌ندێك جاریش مه‌ترسیدار له‌ عیراق، ئه‌وه‌ی جێگای په‌ژاره‌ییه‌كی قوڵیشه‌ بۆ من ده‌مه‌وێ به‌ ئه‌ندامانی ئه‌نجومه‌نی ئاسایشی رابگه‌ینم كه‌ دوێنێ هه‌واڵی دۆزینه‌وه‌ی ته‌رمی به‌ڕێز قه‌یسیمان پێگه‌یشت كه‌ كارمه‌ندێكی نێرده‌ی نه‌ته‌وه‌ یه‌كگرتووه‌كان بوو بۆ عیراق له‌ مانگی نیسانی ٢٠١٥ رفێندرا. من هست به‌ دڵته‌نگی و شۆك ده‌كه‌م به‌ بیستنی ئه‌م هه‌واڵه‌ . داوا له‌ ده‌سه‌ڵاتدارانی عیراق ده‌كه‌م لێكوڵینه‌وه‌یه‌كی گشتگیر و شه‌فافانه‌ و ده‌ستبه‌جێ ده‌كه‌م له‌ سه‌ر ئه‌م رفاندن و و كوشتنه‌ و تاوانبارانیش سزا بدرێن. ده‌مه‌وێت به‌ حكومه‌تی عیراقیش رابگه‌ینم كه‌وا به‌رپرسیاره‌تی ته‌واو له‌ وه‌دیهێنانی دادپه‌روه‌ری له‌ ئه‌ستۆی ده‌سه‌ڵاتی نیشتمانیی دایه‌ و هه‌روه‌ها ده‌سه‌ڵاتی نیشتمانیی به‌رپرسه‌ له‌ پاراستنی گیانی هه‌موو كارمه‌ندانی نه‌ته‌وه‌ یه‌كگرتووه‌كان كه‌ له‌ عیراق كار ده‌كه‌ن .

زانیاری زیاتر

  • Agency: UNAMI